Бројот на туристи кои ја посетиле Грција во периодот јануари – ноември 2024 година е зголемен за 9,7 отсто, споредбено со една година претходно, додека пак приходите од туризмот бележат пораст од 4,9 проценти, според прелиминарните податоци од Банката на Грција, јави дописничката на МИА од Атина.
Поконкретно, за 11 месеци, Грција ја посетиле 35,1 милиони туристи, наспроти нешто повеќе од 32 милиони во истиот период во 2023 година, а приходите за земјата се 21,2 милијарди евра,
Конкретните податоци покажуваат дека 2024 година ќе биде рекордна за земјата и поуспешна од ланската со оглед на тоа што во текот на 2023 година, земјата ја посетија 32,7 милиони туристи, a приходите од туризмот беа 20,5 милијарди евра.
Зголемувањето на приходите, според Банката на Грција, се должи на зголемувањето на приходите од жителите на земјите од Европската Унија за 6,3 отсто и од жителите на другите земји за 0,5 проценти.
Во однос на бројот на туристи, пораст има и на бројот на посетители и од земјите на ЕУ (за 10,8 проценти) и од земјите вон Унијата (за 8,1 отсто).
Патничкиот сообраќај преку аеродромите бил зголемен за 10,2 отсто, а преку копнените гранични премини за 9,5 проценти. (МИА)
Извор: kurir.mk
