После новогодишните празници, бројот на заболени од грип се зголемил за 47% односно пријавени се 331 случај. Најмногу заболени лица има во општина Дебар а најголем процент на заболени се бележи кај децата од 5 -14 години, а по нив следат најмалите – од 0 до 4 години.
Од Институтот за јавно здравје соопштуваат дека во првата недела на јануари, преовладувале заболувањата предизвикани од респираторниот синцицијален вирус.
– Регистрирани се еден пациент со грип – Influenza А(H3) и 5 со респираторен синцицијален вирус (RSV). Сѐ уште не е достигнат прагот на влез во сезоната на грип. Се забележува зголемување на бројот на заболувања слични на грип, кој сè уште е под неделната граница за сезонска активност. Согласно овие податоци, Р.С. Македонија има низок интензитет на вирусот на грип. – Институтот за јавно здравје.
Епидемиолозите очекуваат пикот на сезоната на вирусот на грип да биде во февруари и порачуваат дека се уште не е доцна граѓаните да се вакцинираат против сезонскиот грип.
Епидемиолозите потврдуваат дека секоја година бројот на вакцинирани од сезонски грип се зголемува, особено видлив резултат има кај популацијата над 64 години – кај нив се забележува колективен имунитет и низок процент на заболување.
Извор: 24vesti.mk
