Индустриското производство во ноември 2024 година е помало за 3.5 проценти во споредба со ноември 2023 година, а во периодот јануари – ноември 2024 година се бележи намалување од 3.8 проценти во однос на истиот период во 2023 година, соопшти Државниот завод за статистика.
Најголем пад е забележан во секторот Снабдување со електрична енергија, гас, пареа и климатизација со опаѓање од 6.7 проценти. Во секторот Преработувачка индустрија има намалување од 2.7 проценти, а во Рударството и вадењето камен од 3.2 проценти. Намалувањето во Преработувачката индустрија се должи на пад во производството на прехранбени производи, пијалаци, текстил, облека, хартија, хемикалии, фармацевтски производи, гума и пластични производи, како и моторни возила и машини.
Производството на енергија е намалено за 6.6 проценти, капитални производи за 11.1 проценти, а нетрајни производи за широка потрошувачка за 6.9 проценти. За разлика од тоа, пораст е забележан во производството на интермедијарни производи, освен енергија (4.3 проценти) и трајни производи за широка потрошувачка (36.2 проценти).
ИЗВОР: racin.mk
