Почнува зимскиот распуст, учениците се враќаат на училиште на 20 јануари

Од денес, учениците од основните и средните училишта се на зимски распуст, кој ќе трае до 20 јануари, кога започнува второто полугодие.

Учебната година ќе заврши на 10 јуни, освен за учениците од завршните години во средното образование, кои ќе имаат часови до 16 мај. Оваа година, пролетниот распуст е укинат, што е промена од минатата година, кога учебната година заврши на 17 јуни.

Одлуката за укинување на пролетниот распуст е донесена по анкета спроведена од Министерството за образование и наука (МОН), во која наставници, родители и ученици од повисоките одделенија изразиле поддршка за оваа промена.

На почетокот на учебната година, МОН информираше дека 245 илјади ученици се запишани во основните и средните училишта, што е намалување од 17 илјади ученици во последните седум години.