АНКАРА (АА) – Турскиот претседател Реџеп Таип Ердоган денес изјави дека единствена цел на Туркије е да обезбеди мир, спокојство и стабилност во целиот нејзин регион, почнувајќи од Сирија, јавува Анадолу.
Говорејќи на состанокот на Партијата на правдата и развојот (АК Партија), Ердоган изјави:
„Воодушевени сме секогаш кога ќе го видиме нашето знаме со ѕвезда и полумесечина покрај знамето на слободна Сирија во (сириските градови) Алепо, Дамаск, Хама, Хомс, Дара и Мунбич.“
„Ќе ја елиминираме терористичката организација (ПКК) додека таа се обидува да изгради ѕид од крв меѓу нас и нашите курдски сестри и браќа“, додаде турскиот претседател, мислејќи на терористичката група, присутна и во Сирија и во Ирак, во чија повеќедецениска кампања против Туркије се убиени околу 40.000 луѓе.
Тој накратко се осврна и на последните настани во Сирија.
„Со почит ги поздравувам нашите браќа од Сирија што извојуваа прекрасна победа по 13 години борба“, рече Ердоган.
Тој, исто така, истакна дека според сите показатели економијата на Туркије во доменот на инвестициите, производството, вработувањето и извозот со сигурни чекори напредува кон зацртаните цели за раст.
Извор: Anadolu Agency (AA)
