ГАЗА, Палестина (АА) – Најмалку 24 Палестинци се убиени во израелските воздушни напади во текот на ноќта врз домови и шатори во камповите за раселените во Појасот Газа, соопштија медицински извори, јавува Анадолу.
„Десет лица ги загубија своите животи кога израелски борбен авион погоди куќа во областа Маен во јужниот град Кан Јунис“, изјави еден извор.
„Уште две лица се убиени во друг напад чија цел беше стан во населбата Ал-Манара во јужниот дел на Кан Јунис“, додаде тој.
„Тимовите на цивилната одбрана ги извлекоа телата на двајца Палестинци по израелскиот напад врз шаторот за раселените цивили во западниот дел на Кан Јунис“, соопштија медицинските лица.
„Еден човек и неговата сопруга исто така се убиени, а неколку луѓе беа повредени кога израелските сили бомбардираа куќа во бегалскиот камп Нусејрат во центарот на Газа“, изјави друг медицински извор.
„Израелските воени авиони, исто така, погодија куќа во областа Џабалија Назла во северниот дел на Газа, при што се убиени шест лица“, додаде тој.
Една бремена жена е убиена во воздушен напад врз стан во градот Газа, додека еден млад човек го загуби животот, а три лица се повредени во друг напад во централниот град Деир ал Балах, според истиот извор.
Во меѓувреме, израелската Армија продолжува да крева во воздух куќи и станбени згради во северниот дел на Појасот Газа во време на нејзините тековни воени операции во областа, според очевидци.
Израелските сили, исто така, по вторпат детонираа експлозив во близина на болницата Ал-Авда во северниот дел на Газа, се вели во соопштението на болницата.
Израел започна голема копнена операција во северниот дел на Газа на 5 октомври за наводно да ја спречи палестинската група Хамас да се прегрупира. Палестинците, сепак, го обвинуваат Израел дека сака да ја окупира областа и насилно да ги исели нејзините жители.
Оттогаш, не е дозволена доволно хуманитарна помош, вклучувајќи храна, лекови и гориво во областа, оставајќи го преостанатото население на работ на неизбежен глад.
Од почетокот на нападите на израелската Армија врз Појасот Газа се убиени над 45.300 луѓе, главно жени и деца.
Меѓународниот кривичен суд (МКС) минатиот месец издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата за неговата смртоносна војна во Газа.
Извор: Anadolu Agency (AA)
