ТЕТОВО (АА) – Претседателот на Големото народно собрание на Туркије (ТБММ), Нуман Куртулмуш, изјави дека Туркије сака народите на Балканот да вложат напори заедно и во единство кон заедничките цели, јавува Анадолу.
Куртулмуш, кој престојува во посета на Северна Македонија, учествуваше на конференцијата на Универзитетот во Тетово (УТ) на тема „Во потрага по нов глобален систем“, на која присуствуваа и ректорот на УТ, проф. д-р Јусуф Зејнели, амбасадорот на Туркије во Скопје, Фатих Улусој, политичари, претставници на академската фела и локални и турски институции во земјава, студенти и други гости.
Во својот говор Куртулмуш ги спомена предизвиците со кои се соочува светот, како што се климатските промени, нееднаквоста меѓу народите и војните.
Тој рече дека светот не може да чекори кон поправеден систем и војните не може да запрат сè додека сегашниот светски поредок е доминиран од мал број држави, наведувајќи го правото на вето на петте постојани членки на Советот за безбедност на Обединетите нации.
„Она што нашиот претседател Реџеп Таип Ердоган го нагласува во секој случај, дека светот е поголем од пет, не е само политичко барање туку барање за правда, тоа е повик за правда. Светот не е место со кое треба да се управува како што ќе велат само пет земји“, рече Куртулмуш, нагласувајќи ја потребата од воспоставување нов светски поредок.
„Агресијата на Израел, геноцидот и систематските воени злосторства во Газа ни покажуваат уште еднаш дека се поткопани основните човекови права“, реле спикерот на турскиот Парламент.
Тој наведе четири принципи што се неопходни за правилен светски поредок.
„Потребни се значителни напори новиот систем да се изгради врз четири основни принципи, правда, инклузивност, учество и доследност“, рече Куртулмуш.
Тој рече дека Туркије се гледа себеси како нераскинлив дел од Балканскиот Регион. „Сите народи овде ги гледаме како членови на нашето семејство“, додаде Куртулмуш.
„Ќе продолжиме да ги одржуваме нашите блиски односи со сите народи на балканските простори“, рече претседателот на турскиот Парламент, додавајќи: „Ние сакаме сите народи на Балканот да вложат напори заедно и во единство кон заедничките цели.“
Претседателот на Големото народно собрание на Туркије (ТБММ), Нуман Куртулмуш, во Северна Македонија пристигна во саботата заедно со делегација што ја сочинуваат заменик-претседателот на групата на АК Партија, Бахадир Јенишехирлиоглу, претседателот на Интерпарламентарната група за пријателство Туркије-Северна Македонија и пратеник од Бурса, Ахмет Килич, пратеникот на АК Партија од Ван, Кајхан Туркменоглу, пратеник на АК Партија од Чорум, Јусуф Ахлатџи, заменик-претседателот на Интерпарламентарната група за пријателство Туркије-Северна Македонија и пратеник на ЏХП од Киркларели, Веџди Гундогду, пратеникот на МХП од Бурса, Февзи Зирхлиоглу, и пратеникот на партијата Саадет од Измир, Мустафа Билиџи.
Тој во Скопје се сретна со неговиот колега Африм Гаши, премиерот Христијан Мицкоски и претседателката Гордана Силјановска Давкова, а учествуваше и на свечен прием по повод 21 декември, Денот на наставата на турски јазик во Северна Македонија.
Извор: Anadolu Agency (AA)
