Компаниите во кои работат средношколци од дуални паралелки, ќе мора да обезбедат дополнителна парична надокнада за нив додека им трае средното образование. Ова го предвидуваат измените на законот за средно образование, со кои освен државната стипендија која ја добиваат, средношколците од компаниите ќе добиваат и плата. Дел од фирмите, овој модел веќе почнале да го применуваат. Бојана Димовска е директорка на една таква компанија со странски капитал, која произведува медицинска опрема и соработува со државното средно стручно училиште од Велес. Вели дека ефектот од овој потег никој не го очекувал.
За пет години, бројката на компании вклучени во дуалното образование порасна од 10 на 500. За Стопанската комора, која заедно со швајцарската амбасада е партнер на државата во овој проект наречен „Образование за вработување“, ова е вистинскиот пат фирмите да добијат компетентен и обучен кадар, а младите луѓе вработување со пристојна палата, веднаш по завршувањето на средното обрзование.
За да се унапреди дуалното образование, Министерството за образование бара од општините информации за потребите на пазарот на труд. На тој начин ќе се овозможи вработување на младите и нивно останување во земјава, вели министерката за образование Весна Јаневска.
Дел од училиштата добиваат и грантови за подобрување на условите за учење, па така државното средно Коле Неделковски од Велес доби половина милион евра, пари со кои се опремува машинската работилница во училиштето. Во моментов, 62 училишта со 235 паралелки спроведуваат дуално образование во земјава, во кои се опфатени околу 4000 ученици.
Извор: 24vesti.mk
