Германскиот министер за одбрана Борис Писториус изјави дека Германија мора да биде подготвена да се спротивстави на сите хибридни напади од Русија, кои вклучуваат кампањи на социјалните мрежи дизајнирани да им помогнат на екстремните десничарски и популистички партии, јави ДПА.
„Путин е вклучен во хибридни напади и особено Германија е во фокусот“, изјави Писториус за весниците од медиумската група „Функе“ (Funke Mediengruppe) во изјава објавена денеска.
-Тој добро нè познава, Путин знае да не прободе, додаде министерот за одбрана, кој е социјалдемократ. „Со игнорирање на оваа закана бидејќи нè прави да се чувствуваме непријатно, нема да ја направиме помала, туку поголема“, е оценката на Писториус.
Писториус посочи дека нападите ќе влијаат на германската инфраструктура, снабдувањето со енергија, активностите во Северното и Балтичкото Море и ќе предизвикаат нарушување на воздушниот простор.
-Дел од стратегијата на Путин е да го наруши и подели нашето општество, смета министерот. Мораме да направиме сè што можеме за да ја спречиме стратегијата на Путин да успее, вели тој.
Запрашан дали Германија е таму каде што треба да биде воено, Писториус вели: „Ние сме на вистинскиот пат“. Само оваа година започнаа 97 големи проекти во вредност од 58 милијарди евра, со што го надминаа минатогодишниот рекорд.
-Пренесовме голема количина материјали во Украина. Покрај тоа, на индустријата и треба време да го зголеми својот производствен капацитет за оружје и муниција“.
Писториус објасни дека на тенкот Леопард му требаат до две и пол години за испорака, додека на фрегатите и подморниците од шест до осум години.
Извор: 24vesti.mk
