ИСТАНБУЛ (АА) – Турскиот претседател Реџеп Таип Ердоган денес ја потврди посветеноста на неговата земја да ѝ помогне на Сирија за време на нејзиниот процес на транзиција по падот на режимот на Башар Асад претходно овој месец, јавува Анадолу.
„Го поддржуваме сирискиот народ во непречено управување со процесот на транзиција, без никакви пречки на патот“, изјави Ердоган на новинарите при враќањето од Каиро, каде што присуствуваше на 11-тиот самит Д-8 вчера.
Тој, исто така, најави дека турскиот министер за надворешни работи Хакан Фидан наскоро ќе ја посети Сирија за да работи на новата структура што треба да се формира во земјата.
„Доколку Сирија воспостави навистина стабилна структура со оваа нова формација, според мене, таа ќе има многу силна позиција во исламскиот свет“, додаде тој.
Осврнувајќи се на итните прашања како што се недостигот на енергија и безбедносните предизвици во соседната земја, Ердоган вети дека брзо ќе ги реши енергетските проблеми на Сирија и ќе ги зајакне трговските односи и со Дамаск и со Ирак.
„Ќе ги интензивираме нашите трговски врски со Ирак и Сирија. Тоа ќе донесе нов импулс и за Сирија и за Туркије во секој поглед“, истакна тој.
Ердоган, исто така, се осврна на загриженоста за регионалната безбедност, повикувајќи на конзистентност во тоа како западните земји ги третираат терористичките организации.
„Како што ДЕАШ не може да одржува демонстрации на улиците и плоштадите во западните земји, така не треба ниту ПКК и нејзините ограноци“, рече тој.
Нагласувајќи го намаленото влијание на ПКК, Ердоган изјави дека терористичката организација и нејзините ограноци „дошле до крајот на својот животен век“.
Во врска со пошироките геополитички прашања, Ердоган ги повика западните земји, особено САД, да преземат акција против израелската окупација на сириските територии.
„Мора гласно да се прогласи за неприфатлива окупацијата на Израел на сириските територии“, рече тој.
Ердоган, исто така, посочи на злосторствата извршени во затворот Седнаја, лоциран во близина на Дамаск, под власта на Асад, како симбол на злоупотребите на режимот.
„Злосторствата, вонсудските убиства и неправдите таму се меѓу најболните слики на реалноста (за време) на режимот на Баас“, истакна Ердоган и вети:
„Туркије ќе направи сѐ за режимот на Асад, кој изврши злосторства врз сопствениот народ, да биде повикан на одговорност според меѓународното право“.
Извор: Anadolu Agency (AA)
