Националниот младински совет на Македонија (НМСМ) се повлече од партнерството со Град Скопје за кандидатура на градот за Европска младинска престолнина 2025.
Како што велат тие, повлекувањето доаѓа како резултат на забележани недостатоци во младинските политики и непочитувањето на законските обврски кои се предуслови за ваков тип кандидатура.
Претседателот на НМСМ, Филип Ивковски во интервју за Трн.мк вели дека тие го презеле делот од младинските политики и ја воделе таа компонента од апликацијата, но Град Скопје не покажеле доволна иницијатива за реализирање на механизмите за младинско учество, кои се предуслови за Европска младинска престолнина. Од градот не забележале доволно интерес и подготвеност, поради што и се повлекле од партнерството.
„Имавме повеќе обиди за контакт, особено поради тоа што тимот за апликацијата неколкупати се смени. Комуникацијата со одделението за соработка и меѓународни односи беше ок, но кога дојде време за контакт со Градоначалникот, комуникацијата прекина и остана на ниво на е-пошта и телефонски разговори“ вели Ивковски за Трн.мк.
Тој додава дека Град Скопје има формирано Собрание за млади, но дека тоа е нефункционално и со истечен мандат.
„Потребни се локален младински совет, стратегија за млади и младински центар, кои не се воспоставени – и тоа во главниот град кој има најмногу ресурси за нивно имплементирање“ потенцира Ивковски.
НМСМ веќе го информирале Европскиот младински форум за повлекувањето од партнерството со Град Скопје и апелираат до институциите да се фокусираат на создавање реални младински политкики, кои ќе одговараат на реалните потреби на младите, а не само титуларно учество на младите во креирање на младински политики.
„Во соседството има инспиративни примери како Тирана и Нови Сад. Тирана пред неколку години ја доби титулата Европска младинска престолнина, а Нови Сад исто така значително ги унапреди младинските механизми за учество. Овие примери покажуваат дека кога институциите навистина вложуваат во создавање политики за младите, резултатите се видливи и реални. Ова може да биде дополнителен стимул за нашите институции, кои треба да дејствуваат во корелација со нашиот општествен контекст и да ги применат успешните практики на начин соодветен за нашата средина“ вели Ивкоски.
ИЗВОР: racin.mk
