АНКАРА (АА) – Железничката мрежа на Туркије се очекува да достигне над 14.000 километри, а брзата железничка мрежа да надмине повеќе од 2.600 километри во 2025 година, според Предлог-буџетот на Владата на земјата за 2025 година, јавува Анадолу.
Инвестициите во железницата во согласност со Предлог-буџетот на централната Влада имаат цел да ги зголемат стандардите на постојните линии и да се фокусираат на товарниот транспорт, поврзувајќи ги индустриските зони, пристаништата и логистичките центри со главните линии.
Програмата алоцира 309,6 милијарди турски лири (9 милијарди долари) за следната година, 10,1 милијарди долари во 2026 година и 10,9 милијарди долари во 2027 година за изградбата, работата и услугите на железницата.
До крајот на оваа година се очекува железничката мрежа да достигне над 13.900 километри, следната година се планира должината да се зголеми на над 14.200 километри, а во 2027 година на повеќе од 15.900 километри.
Според буџетот, железничките линии со двоен колосек во вкупната главна мрежа треба да се зголемат на 18 отсто следната година, на 19 отсто во 2026 година и на 21 отсто во 2027 година.
Програмата, исто така, има цел да го зголеми уделот на железницата во превозот на патници од 5,93 отсто следната година на 6,12 отсто во 2026 година и на 6,3 отсто во 2027 година.
Целната должина за брзите железнички линии е нешто повеќе од 2.600 километри следната година, 2.800 километри во 2026 година и 4.100 километри во 2027 година.
Буџетските инвестиции во железницата имаат цел да ја претворат Туркије во важна логистичка база, овозможувајќи големи можности за извоз.
Во програмата се проценува учеството на железницата во вкупниот товарен транспорт следната година да се зголеми на 6,76 отсто, во 2026 година на 7,53 отсто и во 2027 година на 7,7 отсто.
Извор: Anadolu Agency (AA)
