Истражување: САД со најлош здравствен систем меѓу 10 најбогати земји

ВАШИНГТОН (АА) – Соединетите Американски Држави (САД) засега го имаат најлошиот здравствен систем од 10 богати развиени земји, покажа истражувањето објавено денес, јавува Анадолу.

Студијата од Фондот на Комонвелтот, приватна фондација која прави годишен извештај за рангирањето на здравствената заштита од 2004 година, покажа дека Австралија, Холандија и Велика Британија ги имаат најдобрите три здравствени системи, но се наведува: „Разликите во целосните перформанси меѓу повеќето земји се релативно мали“.

Тоа, сепак, ги исклучува САД, за кои се наведува дека се „единствено и јасно далеку“ бидејќи нивниот здравствен систем е со перформанси „драматично пониски“ од останатите 10 земји.

„САД и понатаму се во класа сами поради недоволната ефикасност на нивниот здравствен сектор“, напишаа авторите во извештајот. „Иако останатите девет земји се разликуваат во одредени детали на нивните системи и во нивните перформанси, со исклучок на САД, сите тие најдоа начин да ги задоволат најосновните потреби за здравствена заштита на нивните жители, вклучително и универзално покривање“.

Истражувањето ги вклучува системите за здравствена заштита во Австралија, Канада, Франција, Германија, Холандија, Нов Зеланд, Шведска, Швајцарија, Велика Британија и САД. Ги оценуваше врз основа на пристапот до здравствената заштита, процесот, административната ефикасност, правичноста и здравствените резултати.

Иако ниту една земја не работела континуирано добро во сите домени, САД се на последното место според пристапот до здравствената заштита, процесот на лекување, правичноста и здравствените резултати. Се рангираше на деветтото место по административна ефикасност, подобро само од Швајцарија.

Достапноста на здравствената заштита поради чинењето останува главна пречка за Американците кои сакаат пристап до здравствениот систем на земјата, што во извештајот е опишан како „голем проблем“.

Се проценува дека 26 милиони Американци немаат никакво осигурување за здравствена заштита, додека многу други се недоволно осигурени поради зголемените одбитоци во плановите за приватно осигурување.

Тоа во голема мера се разликува од Велика Британија каде Националната здравствена служба обезбедува бесплатна универзална здравствена заштита, и во Германија, која ги ограничува одбитоците врз основа на приходите на пациентот.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.