БЕЈРУТ (АА) – Израел денес изврши интензивни воздушни напади врз неколку градови во Јужен Либан, во услови на зголемена загриженост за ескалација на конфликтот меѓу Хезболах и Тел Авив, јавува Анадолу.
Тензиите следуваа по двата брана експлозии на безжични уреди во Либан, кои резултираа со 37 загинати и илјадници повредени.
Репортерот на Агенција Анадолу јави дека над 50 воздушни напади се случиле во градовите во Јужен Либан.
Либанската национална новинска агенција објави дека воени авиони „извршиле серија напади врз Областа Махмудије, во близина на селото Аичије, и Касарат ал-Арош во подрачјето на Џезине“.
„Израелски непријателски авиони истрелаа десет проектили кон областа Биркет Џабур“, се наведува во соопштението.
Тензиите меѓу Израел и Хезболах се интензивираа последниве денови по бранот експлозии вчера на безжичните уреди „ICOM“ низ Либан, при што загинаа 25 лица и 450 беа повредени.
Експлозиите следуваа по слични експлозии на пејџери во вторникот, при што загинаа 12 лица, меѓу кои две деца, а беа повредени 2.800, од кои 300 во критична состојба.
Либанската Влада и Хезболах го сметаат Израел за одговорен за експлозиите на пејџерите и му се заканија со „тешки последици“.
Досега нема коментар од Израел за експлозиите што се случија во период на ескалација на прекуграничната војна меѓу Израел и Хезболах од почетокот на израелската смртоносна офанзива во Појасот Газа, во која загинаа речиси 41.300 лица, главно жени и деца.
Извор: Anadolu Agency (AA)
