Додека Тел-Авив официјално молчи, висок либански безбедносен извор за Ројтерс изјави дека израелската разузнувачка агенција Мосад стои зад поставениот експлозив во 5.000 пејџери кои вчера симултано експлодираа и ранија илјадници припадници на групата.
Засега во нападот загинаа девет луѓе, а меѓу убиените се и син на политичар на Хезболах и 8-годишно девојче, но поради огромниот број на тешко ранети се очекува бројката на жртви да расте.
Според либанските надлежни органи, пејџерите се од тајвански производител, но набрзо се огласи компанијата, која тврди дека тие се направени под нејзина лиценца од компанија со седиште во Будимпешта. Дел од безбедносните аналитичари велат дека се работи за разузнавачко-безбедносна операција без преседан во историјата, која задала сериозен удар на проиранскиот Хезболах во Либан.
Експлозиите на пејџерите се случуваат во време на зголемени тензии меѓу Израел и Хезболах, и инвазијата врз Газа која сеуште трае. Запаливата ситуација ги вклучи САД, Турција и регионалните арапски држави во зголемени дипломатски активности во обид да се спречи поголема војна помеѓу Израел и Иран во која би се вклучиле и САД. Хезболах од своја страна порача „отпорот ќе продолжи денеска, како и секој друг ден, операциите за поддршка на Газа, како и дека Израел го чела сурова казна за масакрот.
Сите досегашни информации укажуваат дека Мосад во соработка со службите на израелската армија успеал да се инфилтрира во мрежата на транспортот на пејџери кои Хезболах ги купи пред неколку месеци. Најголем дел од пејџерите кои експлодирале биле новиот модел АР924, кој, како што се сомнева, содржел мало количество експлозив (од 5 до 50 грама) во пратките за членовите на Хезболах.
Извор: 24vesti.mk
