Седница во Европскиот парламент: „Израел со поддршка од западните земји врши геноцид во Газа“

БРИСЕЛ (АА) – Голем број пратеници во Европскиот парламент (ЕП) порачаа дека политиката на Европската Унија (ЕУ) кон Газа се заснова врз двојни стандарди и дека треба да се применат остри санкции за да се запрат израелските напади врз Палестинците, известува Анадолу.

Во ЕП се одржа седница на која новоизбраните парламентарци ја презедоа функцијата по изборите одржани на 6 и 9 јуни.

На седницата пратениците во Европскиот парламент разговараа и за ситуацијата во Појасот Газа.

Голем број парламентарци јасно ставија до знаење дека политиката на ЕУ кон Израел е пристрасна, а акциите на Израел во Појасот Газа ги нарекоа геноцид и се залагаа за воведување санкции за Владата на Бенјамин Нетанјаху.

Ирскиот парламентарец Аодхан О’Риордејн рече дека во Газа се случува „ништо друго туку целосна хуманитарна катастрофа“.

„Убиени се 41.000 Палестинци. Газа е претворена во урнатини. Два милиона жители на Газа гладуваат, живеат без струја, без чиста вода, уништени канализациски системи или целосно нефункционални болници. Одговорот на ЕУ на оваа криза е целосно несоодветен и неприфатлив“, рече О’Риордејн.

Жауме Асенс Лодра, шпански парламентарец од партијата на Зелените, праша: „Колку долго Европа ќе продолжи да го поддржува касапот Нетанјаху?“

„До кога меѓународната заедница ќе го толерира сето ова? До кога ќе ги игнорираат одлуките на Меѓународниот суд на правдата и Меѓународниот кривичен суд? Уште колку смртни случаи ни се потребни? Злосторничко лицемерство е да дојдеш тука и да плачеш за мртвите, а потоа да продолжиш да праќаш оружје што го овозможува сето тоа. Лицемерно е да се воведуваат санкции за рускиот претседател Владимир Путин, а да не се воведуваат санкции за Нетанјаху. Жртвите се исти, без разлика дали се Украинци или Палестинци“, рече Лодра.

Рима Хасан, француска парламентарка, се обиде да излезе на говорницата со кефије на рамото, но не ѝ беше дозволено.

Таа во своето обраќање рече дека на палестинската територија е извршен геноцид и дека ЕУ со санкции би можел да изврши притисок врз Израел.

Левичарскиот белгиски пратеник Марк Ботенга рече дека Израел врши геноцид врз Палестинците.

„Геноцидот што се случува таму не би бил можен без ефективна поддршка од Западот. Ова е геноцид што го изврши Израел со поддршка од западните земји“, рече Ботенга.

Тој порача дека мора итно да се прекине страдањето на Палестинците.

„Како можете да ги погледнете своите деца во очи кога ќе се вратите дома навечер? Како можете со мирна совест да им кажете ‘добра ноќ’? Тоа воопшто не можам да го разберам“, рече овој парламентарец.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.