Поранешниот американски претседател Доналд Трамп го даде своето прво интервју откако преживеа обид за убиство на предизборен митинг одржан во Пенсилванија, но и во која насока ќе оди неговата политичка кариера во иднина.
Во интервју за „Њујорк пост“, Трамп изјави дека сакал да го продолжи говорот и по пукањето во Пенсилванија, но дека Тајната служба инсистирала тој да ја напушти сцената и да оди во болница да се лекува бидејќи крварел.
„Не треба ни да бидам овде, треба да бидам мртов. За среќа, сè уште сум тука. Ова е можност да се обедини целата земја, дури и целиот свет.“ – изјави Трамп.
Трамп ја продолува претседателската кампања, но, вели дека целосно го променил текстот на говорот што ќе го одржи на Републиканската национална конвенција во Милвоки и дека сака да го искористи овој историски момент за обединување на државата. Американскиот претседател Џо Бајден во обраќање до нацијата побара умереност во изборната кампања.
„Ние разликите ги решаваме на гласачките кутии. Така го правиме тоа – со гласачката кутија, а не со куршуми. Политичката дебата во земјата стана многу вжештена. Време е да ја оладиме. Сите имаме одговорност да го направиме тоа“. Нема место за ваков вид насилство во Америка, без исклучок. Ние не сме непријатели.“ – изјави Бајден.
На противкандидатот на Бајден, Доналд Трамп, беше пукано за време на предизборниот говор во сојузната држава Пенсилванија. Трамп беше повреден, а сторителот, 20-годишниот Томас Метју Крукс бил убиен од безбедносните сили. Тој претходно застрелал пожарникар кој бил присутен на настанот а двајца други присутни беа сериозно повредени. Светот реагираше со згрозеност од она што се случи во САД и стравува од спирала на политичко насилство во таа земја.
По нападот, се поставуваат прашања дали настанот и Трамп биле соодветно заштитени. Бајден најави независна истрага за да се разјасни што точно се случило.
Извор: 24vesti.mk
