Онколози, патолози, рентгенолози и анестезиолози…. Македонските болници имаат сериозен недостиг од овој кадар. За да се пополни.Министерството за здравство во иднина ќе распишува конкурси за овие специјализации, додека пак други за кои има хиперпродукција ќе се ставаат во мирување.
„Ќе дадеме предност на одредени специјализации коишто ни недостасуваат – пред сѐ онкологија, патологија, радиологија, анестезиологија. Овие ќе бидат многу побројни.“ – рече Арбен Таравари – Министер за здравство.
И додека болниците куборат со кадар, медицинскиот факултет секоја година уште во првиот уписен рок ја пополнува квотата за студенти. Годишно околу 200 завршуваат медицина, но голем е и одливот во странство. Според деканот на факултетот, миграцијата на медицински персонал е глобален тренд, но државата мора да се труди да го задржи во земјава.
„Со тој проблем тешко ќе се справиме. Како што се либерализираат политиките на странските земји за примање на нашите доктори. Но, ние треба да ги подобриме условите пред сè за вработување на дипломираните студенти, ние немаме проблем со студентите. Не ни заминуваат студентите, ни заминуваат дипломираните доктори.“ – изјави проф. д-р Светозар Антовиќ Декан на Медицински факултет Скопје.
Како мерка за задржување на кадарот во земјава, Таравари најави дека петте најдобри студенти по медицина од сите медицински факултети во земјава веднаш по завршувањето ќе добијат понуда за вработување.
И додека се најавуваат мерки, во меѓувреме околу 400 приватни специјализанти се уште работат низ болниците за плата од 26.000 денари и без осигурување. Таравари најави средба со нив и решавање на работниот статус.
Извор: 24vesti.mk
