Грузиската полиција уапси 20 лица при насилното растерување на собирот пред парламентот рано на 13 мај, додека пратениците од владејачката партија Грузиски сон го протуркаа одобрувањето на контроверзниот закон за „странски агенти“ кој многумина го сметаат за закана за слободата на говорот и аспирацијата на земјата кон Европската Унија.
Двајца американски државјани и еден руски државјанин, наводно, биле меѓу уапсените пред парламентот, иако не се објавени детали за нивниот идентитет.
Безбедносните сили употребија сила за да ги растераат демонстрантите кои организираа ноќни протести пред парламентот додека пратениците пристигнаа да расправаат за законот во трето и последно читање. Предлог-законот беше осуден од Соединетите Американски Држави, ЕУ и други како пресликување на сличен руски закон.
На видео снимката од РСЕ се гледа како неколку маскирани полицајци за борба против нереди се менуваат додека жестоко претепаа паднат демонстрант пред да го приведат.
На друго видео, маж чие лице крвари е насилно приведен од бројни маскирани лица кои го тепаат и му ја кинат кошулата.
Неколку недели, десетици илјади Грузијци протестираа против нацрт-законот за „странски агенти“ што го предложи владејачката партија Грузиски сон. Демонстрациите беа многупати насилно растурани со водени топови, солзавец, гумени куршуми, а беа нападнати и од банди насилници ноќе.
Демонстрантите и новинарите покажаа повреди од употребата на гумени куршуми, и покрај негирањата од официјални лица дека таквите методи не се користени против луѓето на улиците.
Според условите на предложеното законодавство, медиумите, невладините и другите непрофитни организации ќе треба да се регистрираат дека „ги спроведуваат интересите на странски држави“ доколку повеќе од 20 отсто од нивното финансирање доаѓа од странство.
Критичарите велат дека тој е моделиран по децениското законодавство за „странски агенти“ што рускиот претседател Владимир Путин го користи за да го задуши несогласувањето и да ги казни независните институции. Претставници на ЕУ рекоа дека законот може да биде значително назадување во кандидатурата за членство на Тбилиси.
Извор: slobodnaevropa.mk
