Сирена во 8:41 часот утрово, што го означува времето кога малолетниот ученик Коста Кецманович почнал да пука во училиштето Владислав Рибникар во Србија и уби девет соученици и чуварот на училиштето.
Во знак на сеќавање на големата трагедија пред една година беше пуштена сирена, а српските медиуми утрово ја прекинаа телевизиската и радио програма точно во моментот кога пред една година почна крвавиот пир. Со тоа и официјално почна комеморативниот ден, што се одбележува под слоганот „Будење“.
Пред училиштето дојдоа родителите на убиените деца, а се собраа и голем број граѓани, пријатели, роднини на жртвите, за да им оддадат почит. На влезот во училиштето поставена е ликовна инсталација „Вел на плачот“, на која се испишани имињата на жртвите, а граѓаните во спомен на загинатите ќе можат да поминат низ таканаречениот „простор на тишината“, кој зафаќа неколку улици и дел од Ташмајданскиот парк.
Прозорците и фасада во делот од училишната зграда каде се случи убиството се покриени со бело платно на кое се нацртани сини птици. Српскиот патријарх Порфирије по повод една година од трагедијата порача дека мора да се бориме за подобар свет, но не со враќање на насилството со насилство. Архитектот Братислав Тошковиќ, претставник на Мултидисциплинарниот тим, вели дека темата ги вовлекла во емотивен виор и дека почнале да размислуваат како да додадат уште многу симболични значења.
Нема да навлегувам во детали, но сигурно ќе видите кога ќе бидете таму дека тоа не е само место каде што се положуваат цвеќиња и каде се сеќаваме на жртвите, туку навистина е болна точка во градот што го доби својот облик и ќе останете таму додека Меморијалниот центар не ја добие својата физиономија.
Претставници на Владата на Србија, предводени од премиерот Милош Вучевиќ, положија цвеќе и запалија свеќи оддавајќи им почит на загинатите во основното училиште. На починатите им се поклони и претседателот на Србија Александар Вучиќ.
– Пред точно една година осамна последното училишно утро за нашите девет ангели и човекот кој ги чуваше и татковски се грижеше за нив. Помина една година од невидената трагедија која остави неизбришлива лузна на душата на целата земја, но болката, неверувањето и неизмерната тага не поминаа. – изјави Александар Вучиќ претседател на Србија.
Убиецот Коста Кецмановиќ една година е во ментална установа, а поради возраста злосторството кое го стори не може да му се смета за кривично дело. Против родителите на малолетниот Кецмановиќ, Владимир и Миљана Кецмановиќ поведени се кривични и пет граѓански постапки.
Извор: 24vesti.mk
