ИСТАНБУЛ (АА) – Турскиот претседател Реџеп Таип Ердоган доцна вечерва се сретна со претседателот на Регионалната курдска управа во Ирак, Нечирван Барзани, и премиерот Масрур Берзани, јавува Анадолу.
Средбата на делегациите се одржа зад затворени врати во Ербил.
Турскиот претседател го прими и лидерот на Курдистанската демократска партија, Масуд Барзани.
Ердоган во Ербил допатува доцна вечерва, а на официјалната церемонија на аеродромот беше пречекан од Нечирван Барзани.
Претходно, Нечирван Барзани на социјалната мрежа Х наведе дека се радува што ќе го прими претседателот Ердоган во Ербил и ќе разговара за итни прашања, вклучувајќи ги мирот, стабилноста и економскиот развој.
Тој рече дека историската посета на Ердоган на Ербил и Багдад доаѓа во чувствителен момент. Додаде дека тоа ги нагласува силните политички, економски и безбедносни односи меѓу Ирак, Регионалната курдска влада на Ирак и Туркије.
Ердоган денеска престојуваше во еднодневна официјална посета на Багдад, при што се сретна со претседателот Абдул Латиф Рашид и премиерот Мухамед Шија Ал Судани.
Во ирачкиот главен град Багдад беше потпишан меморандум за разбирање во врска со соработката на Проектот за развоен пат меѓу Ирак, Туркије, Катар и Обединетите Арапски Емирати (ОАЕ).
Во делегацијата предводена од Ердоган, меѓу останатите ја сочинуваа министерот за надворешни работи Хакан Фидан, министерот за внатрешни работи Али Јерликаја, министерот за одбрана Јашар Ѓулер, министерот за трговија Омер Болат, министерот за енергетика и природни ресурси Алпарслан Бајрактар и шефот на Директоратот за комуникации при турското Претседателство Фахретин Алтун.
Извор: Anadolu Agency (AA)
