Американскиот државен секретар Ентони Блинкен денеска пристигнува во Израел, како дел од интензивните дипломатски напори за време на турнејата низ регионот на Блискиот Исток за да се постигне „траен и моментален прекин на огнот“ во Газа и да се одврати израелската офанзива во Рафа.
Блинкен треба да се сретне со премиерот Бенјамин Нетанјаху и со воениот кабинет на Израел, соопшти Стејт департментот.
Се очекува највисокиот американски дипломат да изврши нов притисок врз Израел да ја откаже офанзивата на Рафа и да укаже на итната потреба да се достави поголема хуманитарна помош за населението во Појасот Газа.
„Нашиот став, кој е многу јасен, е дека голема воена операција во Рафа би била грешка, нешто што ние не го поддржуваме“, изјави вчера Блинкен, пренесе Си-Ен-Ен.
Ова е шеста посета на Блинкен на регионот на Блискиот Исток од почетокот на војната во Појасот Газа, а се одвива паралелно со разговорите што се водат во Катар за пауза во борбите во Газа и ослободување на заложниците.
Советот на безбедност на ОН денеска ќе гласа за американската нацрт-резолуција со која се бара итен прекин на огнот во Газа.
Извор: 24vesti.mk
