Старо-новиот претседател Владимир Путин ја слави изборната победа со којашто успеа да си обезбеди уште еден шестгодишен мандат за лидерската позиција на државата, но неговото победничко обраќање ја заинтригира јавноста откако за прв пат го изговори името на сега веќе починатиот опозиционер Алексеј Навални кој почина во арктичкиот затвор минатиот месец.
Путин потврди дека имало план Навални да биде разменет за други затвореници. На претседателските избори во Русија имаше симболично уште тројца други кандидати кои пак за време на предизборната кампања ниту еднаш не го критикуваа досегашниот претседател, а даваа и поддршка за руската инвазија во Украина.
Путин според прелиминарните резултати, освоил околу 87 отсто од гласовите и обезбеди нов шестгодишен мандат на чело на државата. Руската изборна комисија ја поздрави „рекордната “ победа на Путин оценувајќи дека тоа е доказ за национално единство во светлината на неговиот напад врз Украина, и покрај репресијата на опозицијата.
– Тоа е рекорден показател. Речиси 76 милиони“ гласови. Путин доби 87,29 отсто од гласовите, од 99,76 отсто преброени гласови.
Според Европската Унија, гласањето не било ниту праведно ниту слободно, во процесот не постоела вистинска опозиција, а не биле вклучени ниту меѓународни набљудувачи. Шефот за надворешна политика на ЕУ, Жозеп Борел, рече дека изборите не биле слободни и фер и се базирани на репресија и заплашување. Кина пак му честиташе на Путин за неговата победа, истакнувајќи ги стратешките врски меѓу двете земји.
Лидерите на Северна Кореја, Хондурас, Никарагва и Венецуела, исто така, објавија пораки за славење на победата на Путин. Политичарот којшто владее со Кремљ повеќе од две децении постигна резултат за 10 процентни поени подобар од 2018 и со петтиот мандат, Путин станува лидер со најдолг стаж по Јосиф Сталин. Официјалните резултати ќе бидат објавени во четврток.
Извор: 24vesti.mk
