МАРДИН (АА) – Претседателот на Република Туркије, Реџеп Таип Ердоган, изјави дека палестинскиот народ е сведок на силната поддршка што Туркије ја дава на палестинската борба, јавува Анадолу.
Ердоган на митингот во Мардин истакна дека и овој Рамазан муслиманите го поминуваат тажни поради бројните судири.
„За жал, болката, драмата и нестабилноста владеат насекаде околу нас. Нашиот сосед Сирија копнее за мир и спокојство веќе 13 години. Етничките и секташките тензии продолжуваат кај нашиот друг сосед Ирак. Крвавата војна меѓу Русија и Украина влезе во третата година. Покрај ова, од октомври се додадени и бруталните напади на терористичката држава Израел врз Газа“, рече Ердоган.
Тој истакна дека Туркије е една од земјите кои од првиот ден ѝ даваат најголема поддршка на Палестина и најостра реакција против Израел.
Додаде дека Туркије со бродови и авиони испратила повеќе од 40.000 тони хуманитарна помош во Појасот Газа.
Претседателот Ердоган потсети и дека во Туркије на лекување се донесени повеќе од 900 болни од рак и ранети Палестинци со нивните семејства.
„Сведок на силната турска поддршка за палестинската борба се нашите палестински браќа. Иако некои од неуките меѓу нас не знаат, угнетениот народ на Газа многу добро го знае правилниот и прониклив став на Таип Ердоган. Оваа борба на нашите палестински браќа за права и правда не ја откривме на 7 октомври. Ние сме во оваа борба уште од нашата младост“, рече Ердоган.
Тој изјави дека ја бранел Палестина и ја поддржувал палестинската кауза во секоја фаза од неговиот полвековен политички живот.
Извор: Anadolu Agency (AA)
