ИСТАНБУЛ (АА) – Претседателот на Туркије, Реџеп Таип Ердоган, изјави дека неговата земја е подготвена да им донесе „нови ноќни мори“ на оние што се обидуваат земјата да ја фрлат на колена со тероризам, известува Анадолу.
„Туркије е во ек на подготовки што ќе им донесат нови ноќни мори на оние што се обидуваат да воспостават тероризам по должината на нашата јужна граница и работат на наша штета“, рече претседателот Ердоган по седницата на Кабинетот во главниот град Анкара, мислејќи првенствено на терористичката организација ПКК, која дејствува со седиште преку границата во Северен Ирак, и на ЈПГ-ПКК, сирискиот огранок на ПКК.
Во својата повеќе од три децении терористичка кампања против Туркије, терористите на ПКК се одговорни за смртта на над 40.000 луѓе, вклучително жени, деца и новороденчиња.
„Прашањето што се однесува на нашите граници со Ирак трајно ќе биде решено ова лето“, рече Ердоган.
Тој додаде дека Туркије е одлучна да воспостави безбедносен коридор по должината на своите граници со Сирија, кои се протегаат 30-40 километри во длабочина.
Коментирајќи ги ситуацијата во Појасот Газа и израелските напади врз таа енклава, претседателот Ердоган рече дека трајно решение за проблемот лежи во постигнувањето ефективен и одлучен меѓународен консензус.
„Туркије дава сѐ од себе за Газа и Палестина и ќе продолжи да го прави тоа и во иднина“, порача претседателот на Туркије.
Тој особено укажа на неопходноста на единство на исламскиот свет во овој контекст.
„Исламскиот свет повеќе од кога било претходно треба да биде едно тело, кохерентен и единствен, како совршено изграден ѕид“, порача Ердоган.
Минатата есен земјите од регионот формираа контакт-група заедно со Организацијата за исламска соработка (ОИС) и Арапската лига, со цел да се залагаат за прекин на огнот во Газа и воспоставување на државата Палестина.
Претседателот Ердоган, исто така, истакна дека нема да биде безбедна ниту една држава што го легитимира системскиот грабеж на палестинската земја уште од Втората светска војна.
Осврнувајќи се на ситуацијата во Туркије, претседателот Ердоган рече дека неговата земја остварила нов рекорден извоз во секторот на одбранбената индустрија и воздухопловството во висина од 633 милиони долари во првите три месеци од 2024 година.
„Со вкупно 50 земји потпишани се договори за испорака на 770 беспилотни летала. Само минатата година остварен е извоз на беспилотни летала во вредност од 1,8 милијарди долари“, посочи претседателот на Туркије, Ердоган.
Извор: Anadolu Agency (AA)
