Засилени безбедносни мерки пред погребот на Навални

Погребот на рускиот опозициски политичар Алексеј Навални треба да се одржи денеска (1 март) на московските гробишта каде што е засилено обезбедувањето, како обид на властите да ги обесхрабрат луѓето да присуствуваат на погребот на долгогодишниот критичар на Кремљ.

Портпаролката на Навални, Кира Џармиш, за мрежата X соопшти дека церемонијата треба да започне во 14:00 часот по локално време (12:00 часот по средноевропско време) во Црквата на иконата на Мајката Богородица во московскиот кварт Марино, каде некогаш живеел Навални.

Во близина на гробиштата Борисовско и блиската метро станица дежураат полициски патроли. На улични столбови околу периметарот се поставени надзорни камери, а подготвени се и метални огради, јавува рускиот сервис на Радио Слободна Европа (РСЕ), повикувајќи се на RusNews.

Полицијата во четвртокот дозволувала влез на гробиштата откако ги проверила личните документи и поставила прашања за целта на посетата, објави телеграмскиот канал „Можеме да објасниме“.

Полицијата вршела претрес и на лични предмети со образложение дека се потребни безбедносни мерки.

„И покрај сето противењето, збогувањето со Алексеј дефинитивно ќе биде утре“, наведе Кира Џармиш на мрежата Х во четвртокот.

„Погребна служба во 14 часот, погреб во 16 часот. Доколку сте во Москва, дојдете“, информира Јармиш.

Таа додаде дека погребот ќе се пренесува во живо на Јутјуб.

Претходните денови стотици граѓани ширум Русија беа уапсени само затоа што положија цвеќе на импровизирани споменици на Навални.

Иван Павлов, истакнат руски адвокат за граѓански права кој ја напушти земјата, рече дека руските власти ќе го сметаат погребот како „непожелен масовен настан“ и ќе се обидат да спречат голем број луѓе да присуствуваат.

„Сигурен сум дека ќе има полициски кордони и видео надзор од сите страни. Како превентивни мерки ќе поканат познати активисти во полициски станици или ќе ги посетат во нивните домови за да ги предупредат. Го видовме тоа и порано“, рече адвокатот.

Навални почина на 16 февруари по долгогодишно заробеништво во кое помина повеќе од 300 дена во самица. Нему му беше одбиена медицинска помош, се пожали дека е подложен на лишување од сон и многу повеќе. Руските судови отфрлија повеќе од 40-те жалби што тој ги поднел за наводна злоупотреба.

Во четвртокот, Европскиот Парламент усвои резолуција со која се обвинуваат руската држава и претседателот Владимир Путин за смртта на Навални.

„Европскиот Парламент остро го осуди убиството на Алексеј Навални и ја изразува својата целосна поддршка на Јулија Навални, која е решена да ја продолжи работата што Алексеј Навални ја започна со нејзина поддршка“, соопшти Европскиот Парламент.

Во резолуцијата се наведува дека политичкиот систем на Русија е под контрола на авторитарен режим „кој работи во средина на широко распространета корупција, користи наместени избори за да даде изглед на демократија и ја концентрира целата моќ во рацете на Владимир Путин“.

„Алексеј Навални ја отелотвори борбата за слобода и демократија со својот сон за „убава идна Русија“, рекоа пратениците во Европскиот Парламент и ги повикаа сите членки на ЕУ да продолжат да покажуваат непоколеблива солидарност и активна поддршка кога станува збор за независна Русија, граѓанското општество и демократската опозиција.