АНКАРА (АА) – Јордан и Египет денес остро го осудија израелскиот напад врз Палестинците кои чекаа хуманитарна помош во градот Газа, при што загинаа 104 Палестинци, а 760 се повредени, јавува Анадолу.
Јорданското Министерство за надворешни работи ја истакна „цврстата осуда за таргетирањето на цивилите во Газа“, од страна на израелската армија, кои чекаа хуманитарна помош.
Во соопштението се опишува нападот како „јасно кршење на меѓународното право и меѓународното хуманитарно право“ што „доаѓа во услови на отсуство на меѓународен став за запирање на оваа војна и масакр што Израел го врши врз Палестинците“.
Во меѓувреме, Египет исто така го осуди нападот врз Палестинците и го опиша како „нехумано израелско гаѓање на невооружени палестински цивили“.
„Сметаме дека таргетирањето на мирните граѓани што брзаат да го земат својот дел од помошта е срамно злосторство и флагрантно кршење на меѓународното право“, се вели во соопштението на египетското Министерство за надворешни работи.
Во соопштението, исто така, се повикуваат меѓународните страни да ја преземат својата „хуманитарна, етичка и правна одговорност“ за ставање крај на војната во Газа и обезбедување заштита на палестинскиот народ.
Израелските сили утринава гранатираа толпа Палестинци кои чекаа хуманитарна помош јужно од градот Газа во областа „Кружниот тек Ал-Набулси“, соопшти Министерството за здравство со седиште во Газа.
Израел започна смртоносна воена офанзива врз Појасот Газа по нападот на Хамас на 7 октомври 2023 година, во кој Тел Авив вели дека загинале речиси 1.200 Израелци.
Оттогаш во израелските напади врз Газа загинати се најмалку 30.035 Палестинци, а над 70.457 се повредени.
Израел, исто така, воведе блокада врз Појасот Газа, оставајќи го неговото население, особено жителите на Северна Газа, на раб на глад.
Според Обединетите нации, израелската војна принуди на внатрешно раселување 85 отсто од населението на Газа, каде што владее акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за да гарантира дека ќе се обезбеди хуманитарна помош за цивилите во Газа.
Извор: Anadolu Agency (AA)
