ИСТАНБУЛ (АА) – Авиони на Египет и на Обединетите Арапски Емирати (ОАЕ) по воздушен пат доставија хуманитарна помош до Палестинците во северниот дел на Појасот Газа, објави денес египетската армија, пренесува Анадолу.
Портпаролот на армијата, Гариб Абдел-Хафез, рече дека биле испорачани десетици тони хуманитарна помош и резерви „за да се олесни тешката хуманитарна криза“ во северниот дел на Газа.
Тој рече дека хуманитарната помош содржи храна, лекови и други основни потреби.
Рано утринава Јордан објави дека спровел две операции за испорака на хуманитарна помош во Појасот Газа, во соработка со Оман и Бахреин.
Слични операции изведоа Египет, Јордан, ОАЕ, Катар и Франција претходно оваа недела.
Израел започна смртоносна офанзива врз Појасот Газа откако Хамас изведе напад во Израел на 7 октомври. Во израелските напади врз енклавата досега загинаа над 30.000 луѓе, предизвикувајќи огромно уништување и недостиг на резерви на основните намирници во блокираната палестинска енклава.
На 26 јануари, по тужбата за геноцид поднесена од Јужноафриканската Република, Меѓународниот суд на правдата одлучи дека Израел мора да се воздржи од какви било дејства поврзани со убиства, напади и уништување на жителите на Појасот Газа и да ги преземе сите мерки за да спречи геноцид.
Извор: Anadolu Agency (AA)
