АНКАРА (АА) – Документарниот филм „Нема друга земја“, во кој се зборува за насилството извршено од израелските нелегални доселеници во окупираните палестински земји, ја освои наградата „најдобар документарец“ на 74. Меѓународен филмски фестивал во Берлин (Берлинале). Режисерот на овој документарец Јувал Абрахам на социјалните мрежи објави дека група десничарски Израелци дошле во куќата на неговото семејство и му се заканиле, известува Анадолу.
Во објавата на својот профил на социјалната мрежа X, Абрахам зборува за заканите кон него и неговото семејство по неговиот говор на Берлинале.
Во објавата Абрахам вели: „Десничарска израелска банда вчера, барајќи ме, дошла во куќата на моето семејство и им се заканувале на членовите на моето семејство, кои биле принудени да одат во друг град среде ноќ.“
Посочувајќи дека сѐ уште добива смртни закани и дека морал да го откаже летот за Израел, Абрахам рече дека неговиот говор на Берлинале, во кој „повикува да се стави крај на апартхејдот“, бил необјасниво етикетиран како „антисемитски“ од израелските медиуми и германските политичари и оттогаш се соочува со споменатите тешкотии.
Абрахам тврди дека Германците го злоупотребуваат антисемитизмот не само за да ги замолчат Палестинците кои го критикуваат Израел туку и за да ги замолчат Израелците, како него, кои го поддржуваат прекинот на огнот што ќе стави крај на „убиствата во Газа“ и ќе дозволи ослободување на израелските заробеници. Абрахам смета дека ваквиот концепт ќе ги стави во опасност сите Евреи во светот.
Изјавувајќи дека неговата баба е родена во концентрационен логор во Либија и дека повеќето членови на семејството на неговиот дедо биле убиени од Германците за време на холокаустот, Абрахам изјавил дека е лут што германските политичари „имале храброст терминот антисемитизам да го искористат како оружје против него, загрозувајќи го неговото семејство“.
Тој истакна дека спорното однесување уште повеќе го загрозило корежисерот на филмот, Палестинецот Базел Адра, кој живее во регионот Масафер Јата, кој е под окупација.
Во својот говор на церемонијата на доделување на наградите што се одржа на 25 февруари, Абрахам рече: „Јас сум Израелец, корежисерот на филмот Базел Адра е Палестинец и за само два дена ќе се вратиме во земја каде што не сме еднакви. Јас живеам под граѓански поредок, Базел е под воен поредок. Ние сме на само 30 минути еден од друг. Јас имам право на глас, тој нема. Мене ми е дозволено слободно да се движам во оваа земја, додека Базел, како и милиони Палестинци, е затворен на окупираниот Западен Брег. Мора да заврши оваа нееднаквост меѓу нас.“
Извор: Anadolu Agency (AA)
