На одбележувањето на двегодишнината од почетокот на руската агресија, украинската амбасадорка во земјава, Лариса Дир побара поголема воена помош за својата држава. Таа истакна дека во Украина се води војна против демократскиот свет, но аспирациите на официјален Киев ќе продолжат да бидат членство во НАТО и ЕУ. Според амбасадорката, Украина и сред урнатини и рушевини ќе продолжи да го усогласува украинското со европското законодавство, а за сите овие цели и е потребна помош. Дир побара од земјите сојузнички да размислуваат за заедничко производство на оружје со Украина, како и да се зајакнат санкциите против Русија.
„Украинските војници ги чуваат небото и земјата. Им недостига оружје. Украинските цивили се обидуваат да го прилагодат својот живот со секојдневните ракетни гранатирања. Им недостигаат системи за противвоздушна одбрана“, рече Лариса Дир, амбасадорка на Украина.
Претседателот Стево Пендаровски нагласи дека Македонија ќе продолжи да биде на вистинската страна на историја. Според него, влогот во одранбената војна што ја води Украина е огромен, зашто последиците ги надминуваат нејзините граници. Пендаровски нагласи дека е неопходно да се постигне мир по мерка на Украинците, а евентуалното отстапување територии на Украина за мирот да се постигне, само ќе означува легитимирање на злосторствата.
„Успесите на Украина денес не зависат само од волјата и потенцијалите на украинската армија, туку и од финансиската, логистичката и пред се воена помош која таа мора да ја добива. Секоја поинаква калкулација во овој контекст ќе доведе до уште поголеми страдања, разрушувања во Украина и неизвесност за сите нас“, рече Пендаровски.
Пендаровски најави дека наскоро во Тирана, каде ќе присуствува и украинскиот претседател Володимир Зеленски, земјите од регионот ќе ја реафирмираат поддршката и помошта кон Украина.
Лука Андреев
Извор: alsat.mk
