АЛ-КУДС (ЕРУСАЛИМ) – Воениот кабинет на Израел денес ги одобри упатствата за преговори со Хамас во врска со договорот за размена на затвореници, објавија израелските медиуми, пренесува Анадолу.
Овој потег следеше по разговорите што се одржаа во Париз во петокот меѓу претставниците на Израел, Соединетите Американски Држави (САД), Катар и Египет во врска сол договор за размена на заложници и затвореници меѓу Тел Авив и Хамас.
„Штом Хамас ќе ги прифати овие упатства, Израел ќе испрати делегација во Катар за да ги продолжи разговорите за размена на заложници“, објави весникот „Једиот Ахронот“. Не се објавени детали за упатствата.
Во веста се вели допрва треба да се разговара за многу детали, вклучувајќи ги условите на предложениот прекин на огнот, повлекувањето на израелските сили од Газа и враќањето на раселените Палестинци во северните делови на Појасот Газа.
Според официјалните извори, се верува дека Хамас држи повеќе од 130 израелски заложници заробени по прекуграничниот напад на 7 октомври, додека Израел во своите затвори држи најмалку 8.800 Палестинци.
Во претходниот договор, во ноември беа ослободени 81 Израелец и 24 странски државјани во замена за 240 Палестинци, меѓу кои 71 жена и 169 деца.
Од почетокот на израелските напади на Појасот Газа на 7 октомври досега се убиени најмалку 29.692 Палестинци, воглавно деца и жени, а ранети се повеќе од 69.879 лица, објавија здравствените власти на палестинската енклава. Се претпоставува дека под урнатините се наоѓаат илјадници мртви.
По обвинението за геноцид што го поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да ги преземе сите мерки за да спречи геноцид.
Меѓутоа, израелските сили и понатаму продолжуваат со нападите врз Појасот Газа.
Според податоците на Обединетите нации, 85% од населението на Појасот Газа е интерно раселено и се соочува со акутен недостаток на храна, чиста вода и лекарства, додека околу 60% од инфраструктурата во Појасот Газа е оштетена или уништена.
Извор: Anadolu Agency (AA)
