Државата ќе повлече нови 50 милиони евра од кинеската Ексим банка, за продолжување на работите на автопатот Кичево-Охрид. Ова е предвидено со годишната програма за 2024, на Јавното претпријатие државни патишта.
„Предвидените средства во програмата на ЈПДП за 2024 година се средства од веќе обезбедениот заем од Ексим банка за изградба на автопатот Кичево -Охрид кои мора да бидат предвидени во програмата за да може да се повлечат од сметката“, велат од ЈПДП.
Од таму велат дека преговорите со изведувачот за склучување на анекс на договор за продолжување на рокот на изведба се уште траат. Со тоа уште колку години ќе се гради автопатот Кичево- Охрид, никој не кажува откако последиот рок до 31 декември 2023 беше пробиен. Владата на седницата на 28 декември донесе одлука, Кинезите да продолжат да го градат автопатот.
„Одлуката е донесена по информацијата од Јавното претпријатие за државни патишта, базирана на доставени наоди од главен надзор и надзор на тунел, дека поради реални причини, има потреба од продолжување на крајниот рок, 31 декември 2023 година, за изведба на градежните работи на овој автопат, а при тоа земајќи го предвид фактот за досега реализираниот висок степен на физички извршените работи и решени отворени прашања. Првичниот проект за автопатот Кичево – Охрид, како што е оценето, беше со бројни пропусти во проектирањето, но во голем дел тие се надминати и во континуитет се создаваат услови за негово завршување“, рекоа од Владата.
Во меѓувреме граѓаните продолжуваат да возат по небезбеден и несоодветен обележан пат.
„Ние со самото излегување на овој автопат сме небезбедни.Самата сигнализација и хоризонтална и вертикална малку влијае за безбедноста на сообраќајот“, рече Љупчо Милкоски, експерт по безбедност.
Од почетокот на градбата до денес, имало дури 105 посериозни сообраќајни несреќи, во кои загинале 22 лица, а 128 се здобиле со тешки повреди. Автопатот е долг 57 километри и почна да се гради во 2014 година.
Мики Трајковски
Извор: alsat.mk
