ЛИСАБОН (АА) – Во Лисабон, главниот град на Португалија, се одржа протест на екстремната десница против исламизација на Европа, јавува Анадолу.
Група на крајната десница која себеси се нарекува „1143“ организираше демонстрации под слоганот „Против исламизација на Европа“. Демонстрантите извикуваа слогани против муслиманите, мигрантите и исламизацијата на Португалија и европските држави.
И покрај судската забрана, на улиците на Лисабон се одржа протестот на кој присуствуваа неколку стотици луѓе.
Протестот се одржа на повик на екстремно десничарската група „1143“ преку интернет.
Насобраните носеа транспаренти „Стоп за исламот“ и „Португалија на Португалците“, ја пееја државната химна и извикуваа „Португалија, Португалија“.
Протестот го следеа голем број припадници на полицијата, а некои случајни минувачи извикуваа „Фашизам никогаш повеќе“.
Португалија е земја во која христијаните се мнозинство. Според пописот од 2021 година, муслиманите претставуваат околу 0,4 отсто од вкупното население во земјата. Проценките покажуваат дека во земјата живеат околу 65.000 муслимани.
Извор: Anadolu Agency (AA)
