Со 65 гласа „За“, 3 гласа „против“ и ниту еден воздржан, Собранието ја избра техничката влада, на чело со Талат Џафери и ќе има мандат од 100 дена. Пратениците од опозицијата, очекувано и како што беше најавено не гласаа за изборот на нов мандатар и Влада.
Во своето излагање Џафери рече дека приоритет во неговиот мандат ќе биде спроведување на фер и демократски претседателски и парламентарни избори, владеење на правото и почитување на Уставот и унапредување на стратешките односи со ЕУ, САД и НАТО.
„Владеењето на правото и борбата против корупцијата и организираниот криминал остануваат главен приоритет на Владата. Во однос на подготовката и организирањето на изборите, ќе ги спроведе сите законски, институционални, организациски и оперативни предуслови за спроведување на јасната волја на граѓаните, со цел да се овозможат највисоките европски стандарди во процесот во изборната кампања и самите избори, односно да се одржат избори со целосен легалитет, легитимитет и консензуално прифаќање на изборната волја на граѓаните“, рече Талат Џафери, премиер.
ВМРО-ДПМНЕ упати остри тонови кон Џафери нарекувајќи го воен дезертер како неговиот претходник
Шефот на ДУИ, Али Ахмети одговори на обвинувањата на опозицијата. Ахмети рече дека етничката еднаквост во Македонија донесе стабилност и оваа земја е заеднички дом за сите.
„Пред нас се големи проблеми кои оваа и следната Влада мора да се заложат за решавање и да бидат креативни во градењето политики за иднината. Студената војна заврши и сега е многу жешка војна. Ако сме патриоти, ќе работиме нашата држава да ја зачлениме во ЕУ што е можно поскоро, ако сакаме младите да останат во земјава каде што се родени и живеат“, нагласи Али Ахмети, пратеник на ДУИ.
Левица ја обвини ВМРО-ДПМНЕ дека заедно со СДСМ и ДУИ станува дел од уништувањето на институциите.
Алијанса за Албанците како дел од техничката Влада побара од сите политички актери да ја почитуваат новата меѓуетничка реалност во државата.
„Немаме друг излез. Мора да се земе предвид меѓуетничката реалност во државата. Единствената формула е меѓуетничка кохезија. Продуктивните компромиси се предуслов за тоа. Компромисот не значи етничка, верска и политичка диференцијација, туку напротив, значи прифаќање и развој на различностите“, рече Елми Азири, пратеник на АА.
Министрите од опозициската ВМРО-ДПМНЕ не се појавија на заедничката фотографија со останатите министри од техничката влада.
Мандатот на Техничката влада трае до 8 мај, а нејзината улога е организирање на парламентарните избори./Алсат.мк
Адриан Керими
Извор: alsat.mk
