БЕРЛИН (АА) – Германските машиновозачи денес го започнаа својот најдолг штрајк во историјата, поради спорот со Дојче бан за платите и условите за работа, пренесува Анадолу.
Германскиот синдикат на машиновозачи (GDL) соопшти дека штрајкот на патничките возови започнал во 2:00 часот по локално време и ќе трае до 18 часот в понеделник.
Националниот железнички оператор рече дека меѓуградските, регионалните и приградските железнички услуги ќе бидат значително погодени од штрајкот до 29 јануари.
На патниците им се препорачува да ги проверат своите поаѓања 24 часа пред патувањето, да го одложат патувањето доколку е можно и да го искористат билетот подоцна.
Дојче бан го повика синдикатот да се врати на преговарачка маса.
„Сега е време да се собереме, да преговараме, да најдеме компромиси. Подготвени сме да се состанеме во секое време и на кое било место за преговори и дискусии“, изјави портпаролката на Дојче бан за јавната телевизија АРД.
Најновиот штрајк е четвртиот и најдолг прекин на работата на синдикатот за време на актуелниот колективен договор со Дојче бан.
Синдикатот инсистира на зголемување на платите за 555 евра месечно и еднократна премија за инфлација до 3.000 евра.
Синдикатот бара и намалување на работното време на работниците во смени, од 38 на 35 часа неделно, без намалување на платите.
Извор: Anadolu Agency (AA)
