Во приватниот сектор има вработени кои земаат месечна плата пониска од минималната, велат синдикалците. Иако работат најмалку 8 часа по 6 дена во неделата, парите ги добиваат како хонорар, или во готово… Оваа појава се очекува да се намали со субвенционирањето на платите, мерка предложена во 9 пакет од анти- кризни мерки за месец март.
Министерството за труд и социјална политика соопшти дека во Собранието е доставен закон за субвенции, поточно ослободување од придонеси, со кој се овозможува приватниот сектор да ги зголеми платите на работниците од 3000-9000 денари.
„Во Социо-економскиот совет се разговараше за оперативниот план за вработување, мерките и програмите за 2024 година, каде учествуваа и работодавачи и синдикати, за да ја продолжиме постапката и дополнително да ја одобриме во Влада. Одобрено е и зголемувањето на минималната плата од март. Никој од претставниците на организациите на работодавачи не спомна дека ќе имаат проблем. Дури и тие како работодавачи се задоволни од оваа методологија за зголемување на минималната плата“, велат од Министерство за труд и социјална политика.
За економските експерти, поради ниските плати, приватниот сектор ја загуби конкуренцијата на регионалниот пазар.
„Ќе ви дадам податок кој е песимистички, но кажува многу за оваа ситуација! Од јануари 2023 до јануари 2024 година, некаде близу 14.000 вработени добиле формулари за одјавување од приватниот сектор. Тоа значи дека овие луѓе не гледаат перспектива во приватните фирми во земјава и 95% од нив ќе завршат на западноевропскиот пазар како нововработени, а мал дел ќе се вработат во јавниот сектор. Во земја каде што јавниот сектор сочинува најголем процент од потрошувачката кошница на производи и услуги, нема шанси да имате силен критериум во приватниот сектор“, нагласи Висар Адеми, економски експерт.
Конфедерацијата на синдикални организации на Македонија во неколку наврати го изрази својот револт од несоодветната исплата на вработените во приватниот сектор, особено во текстилниот сектор. Синдикалците велат дека се подготвени повторно да протестираат доколку не им се исполнат барањата, отстранувајќи ја можноста за плати под минималната, која во моментов е 20.170 денари, а од март се очекува зголемување на минималната плата за најмалку 2 илјади денари./Алсат.мк
Аднан Ќаили
Извор: alsat.mk
