Поради снежните врнежи забранет е сообраќајот на тешки возила на патниот правец Гостивар-Стража и на патот Маврово-Дебар, додека сообраќајот на автобуси е запрен и на граничните премини „Јажинце“, „Ќафасан“ и Попова шапка, соопшти Авто мото сојуз на Македонија.
Од Авто мото сојузот информираат и дека поради силниот ветер и обилните снежни врнежи од 08:40 часот, на граничната точка „Јажинце“ е забранет сообраќајот на автобуси и тешки возила, додека за останатите возила задолжително е носење зимска опрема.
Во меѓувреме, од Центарот за управување со кризи соопштуваат дека поради обилните врнежи од снег, од 08:45 часот патниот правец Струга кон граничниот премин „Ќафасан“ е затворен за тешки возила.
Компанијата „Македонски патишта“ апелира на внимателно управување со возилата, почитување на сообраќајните знаци, како и прилагодување на брзината според условите на патот.
Добрата вест е дека снежните врнежи овозможија повторно отворање на скијачката сезона во Попова шапка.
Од Дирекцијата на Македонски патишта информираат и дека машините за чистење веќе неколку пати поминале на патниот правец Тетово – Попова Шапка, но поради континуираните врнежи од снег Дирекцијата им препорачува на возачите на возилата да носат зимска опрема./Alsat.mk
Авни Тахири
Извор: alsat.mk
