Еден од двајцата ранети пред тетовската болница е во тешка состојба. И покрај операцијата, неговата состојба не е подобрена, велат од скопската Клиника. Другиот исто така се лекува во Скопје, но тој е стабилен.
Во меѓувреме, полицијата уапси четворица од петте лица вклучени во пукањето кога беа ранети А.М. на 41 година и З.М. (36). Според полицијата, осомничените биле уапсени синоќа пред полноќ. Прво бил уапсен 55 годишен маж. Ш.Е. од Тетово, а подоцна, лицата Р.Т., 35 години, М.Т., 44 години и Н.М. 39 години. Петтиот е сè уште во бегство.
„Се преземаат мерки за наоѓање на уште едно друго лице. Јавниот обвинител и екипа од СВР Тетово извршија темелна истрага на местото на настанот. Се работи на расветлување и документирање на случајот по што против лицата инволвирани во овој случај ќе следат кривични пријави“, велат од СВР Тетово.
Според информациите од тетовската полиција, на престрелката пред Ургентниот центар во Тетово ѝ претходела тепачка меѓу двете групи на пладне пред Судот во Тетово, односно по напуштање на судското рочиште каде воделе спор.
Министерот за здравство Фатмир Меџити денеска го осуди инцидентот и рече дека тој нема никаква врска со болницата.
„Во Тетово, како што знаеме, се работи за две групи со нерешени проблеми, две лица се ранети и испратени во Скопје. Проблемот не е поврзан со тетовската болница. Другиот дел е оставен на надлежните органи, на МВР и обвинителството да го решат случајот“, рече Меџити.
Во моментот на инцидентот наоколу имало и други пациенти и медицински персонал.
Башким Сулејмани
Извор: alsat.mk
