Централното одбележување на Бадник денеска се одржа пред Соборниот храм „Свети Климент Охридски“. Божидар Јанковски, сопственикот на „Дајнерс“ е кумот за оваа година, а здравичар е актерот Анастас Тановски.
Јанковски во своето обраќање пред присутните кажа дека треба да се покажува добрина не само на овој ден туку и во секој ден од годината.
-“ Како бадникарски кум сакам да ве замолам да покажуваме добрини не само денес, не само на Бадник, туку секој ден во годината. Ве молам да се слушаме, да се гледаме, да се разбираме, да се почитуваме и да си помагаме. Скопје е на сите родени во Скопје, но и на сите кои живеат во него. Таа различност на сите жители на Скопје го прави Скопје метропола. И тоа така засекогаш треба да остане“, рече Јанковски.
Здравичарот Анастас Тановски во своето обраќање денеска посака здравје, среќа, светлина и топлина во нашите души и испрати порака да бидеме човечни и хумани.
-“ Пред некој ден ја испративме старата и ја дочекавме новата година. И еве дојде 6 јануари, денот Бадник кој го најавува утрешниот ден, големиот христијански празник Божиќ- Христовото раѓање.Што да си честитаме и посакаме за овие празници? Пред се, да си посакаме здравје, среќа, да си посакаме светлина и топлина во нашите души, да нема војна, завист и суета меѓу луѓето, да бидеме човечни и хумани“, рече Тановски.
Свое обраќање имаше и градоначалничката на Град Скопје, Данела Арсовска каде посака оваа година да биде исполнета со здравје, хармонија, мир, среќа, радост.
-“ Да бидеме кон ближните свои исполнети со сето она кое што би сакале и останатите да го покажат кон нас. Да им покажеме што значи да бидеме солидарни, да бидеме хумани, да покажеме љубов, разбирање и се надевам дека оваа година секој од нас ќе го покаже најдоброто од себе, и она кое го очекувате останатите да го покажат кон вас“, рече Арсовска.
И градоначалникот на општина Центар, Горан Герасимовски им се обрати на присутините. Тој кажа дека му е чест и задоволство што е дел од традиција која постои 30 години.
-“ На православните христијани им го честитам Бадникот. Посакувам многу здравје, среќа, берикет, слога, политување и меѓусебно разбирање“, рече Герасимовски
ИЗВОР: skopjeinfo.mk
