Покрај одлуката за разрешување на целото раководство на М-НАВ, како исход од владината седница зажана за во вторник идната недела се очекува и повик до надлежните институции за целосна ревизија на досегашното работење на оваа институција
По последните случувања во Македонската навигација, кои ескалираа со денешниот упад во институцијата и напад на тројца вработени, Владата најави дека на наредната седница ќе биде предложена и донесена одлука за разрешување на целото раководство како и на сите членови на Управниот одбор на М-НАВ.
На наредната владина седница, која е закажана за вторник, 9 јануари, покрај одлуката за разрешување на актуелната раководна постава на М-НАВ, се очекува да биде донесена одлука за отворање итна постапка за избор на нови членови на раководството и Управниот одбор во јавен, транспарентен и законски пропишан процес.
Иницијативата за ваквите одлуки, кои се очекува да бидат исход од следната владина седница, е на премиерот Димитар Ковачевски, во консултација со министрите за одбрана и за транспорт и врски Славјанка Петровска и Благој Бочварски.
„Воедно, претседателот на Владата ќе го повика Јавното обвинителство, ДКСК, Државниот завод за ревизија, Финансиската полиција и меѓународните тела за контрола на авиосообраќај да направат целосна ревизија на досегашното работење на М-НАВ“,
се наведува во владиното соопштение испратено доцна вечерва.
Денеска во просториите на Македонската навигација упаднаа неколку непознати лица, кои, според пријавата што стигнала во МВР, заедно со еден од вработените нападнале тројца други вработени во институцијата.
Упадот следеше непосредно откако претседателот на Синдикатот на контролорите на летање, Александар Тасевски, одржа прес-конференција на која информира дека членовите на Синдикатот се под засилен притисок од менаџментот на М-НАВ поради негодувањата на синдикалците за последниот оглас за вработување.
Едно од лицата кои упаднаа во просториите на М-НАВ, според информациите кои ги објави ТВ Алсат, е претседателот на огранокот на ДУИ во Чаир, Беким Незири.
Од полицијата не го потврдуваат идентитетот на напаѓачот, но соопштуваат дека нападот го извршило лице со иницијали Б.Н. – вработено во институцијата. Алсат потсетува дека Незири, своевремено, беше и член на Управниот одбор на Македонската навигација, како и министер за економија. Според сознанија на „360 степени”, Беким Незири сè уште е вработен во М-НАВ.
ИЗВОР: 360stepeni.mk
