ВАШИНГТОН (АА) – Поранешниот американски претседател Доналд Трамп поднесе жалба против одлуката на Врховниот суд на американската сојузна држава Колорадо со која му беше забрането да учествува на изборите, јавува Анадолу.
Додека Трамп се подготвува за претседателските избори во ноември, тој се соочува и со тужби и правни одлуки против него за неговата улога во нападот на Капитол Хил на 6 јануари 2021 година.
Трамп ја оспори пресудата на највисокиот суд на државата на 19 декември, која го прогласи за виновен за неговата улога во упадот во Капитол и му забрани да учествува на изборите во сојузната држава, барајќи од Врховниот суд на САД да ја поништи пресудата.
Адвокатите на Трамп тврдеа дека еден државен суд не може да спречи претседателски кандидат да се појави на гласачкото ливче и дека Врховниот суд на Колорадо погрешно ги протолкувал релевантните уставни одредби.
Се очекува Врховниот суд на САД да ја разгледа жалбата и наскоро да донесе одлука.
По пресудата на Врховниот суд на Колорадо, државната секретарка на сојузната држава Мејн, Шена Белоус, на 28 декември објави дека на Трамп ќе му биде забрането да учествува на прелиминарните избори на Републиканската партија во таа сојузна држава поради неговата улога во упадот во Капитол.
Според пресудата, името на Трамп нема да се појави на гласачките ливчиња на прелиминарните избори на 5 март во двете сојузни држави, каде што ќе се натпреваруваат републиканските кандидати.
Врховниот суд на САД ќе ја донесе конечната одлука за изборната кампања на Трамп во двете сојузни држави.
Извор: www.aa.com.tr
