Путин речиси и да не ја спомна Украина во неговиот новогодишен говор

На почетокот на декември, Путин објави дека ќе се кандидира за петти мандат на функцијата на изборите што треба да се одржат во март 2024 година

Рускиот претседател Владимир Путин повика на обединета поддршка за руската армија во неговото годишно новогодишно обраќање, без експлицитно да се осврне на војната што ја води во Украина, пренесува Би-би-си.

Лидерот на Кремљ ги поздрави своите војници како „херои кои секогаш се во првите редови на борбата за вистината“.

Тој се осврна и на економските прашања, клучна тема за многу Руси и ја прогласи 2024 година за „година на семејството“.

Минатата година, Путин го одржа својот говор опкружен со војници и објави повици за жртва во име на опстанокот.

Оваа година тој се врати на традиционалната позадина на Кремљ, говорејќи сам.

„До сите што се на борбено место, во првите редови на борбата за вистина и правда. Вие сте нашите херои, нашите срца се со вас. Горди сме на вас, се восхитуваме на вашата храброст“,

им порача рускиот претседател на руските војници.

Тој ги спомна илјадниците руски жртви во војната со Украина, како и убиените во пограничниот град Белгород за време на викендот.

„Не еднаш докажавме дека можеме да ги решиме најтешките проблеми и никогаш нема да се повлечеме, бидејќи не постои сила што може да не подели“,

рече рускиот претседател.

Претходно снименото обраќање беше емитувано на државната телевизија непосредно пред полноќ во секоја од 11-те временски зони во Русија.

На почетокот на декември, Путин објави дека ќе се кандидира за петти мандат на функцијата на изборите што треба да се одржат во март 2024 година.

Според странските медиуми, со оглед на тоа што опозиција речиси непостоечка и руските медиуми целосно под негова контрола, се верува дека победата на Путин е неизбежна.