„Бандите ќе стануваат се помоќни“, вели генералниот секретар на меѓународната полиција
Интернационалната полициска организација Интерпол соопшти дека е регистрирано зголемување на прекуграничниот организиран криминал и предупреди дека „бандите само ќе станат помоќни“, пренесе ДПА.
„Се соочуваме со невидена епидемија на прекуграничен организиран криминал. Глобално активните криминални групи стануваат помоќни, повлијателни, поопасни и склони кон насилство на нашите улици“,
истакна Јирген Сток, генерален секретар на организацијата.
Според него, борбата против организираниот криминал треба да ја води целото општество, бидејќи е загрозена стабилноста на заедниците.
„Ниту една земја или регион не може сама да се справи со безбедносната криза“,
заклучи шефот на организацијата со седиште во Лион.
Со 196 земји-членки, Интерпол е најголемата полициска организација во светот и ја координира меѓународната полициска соработка. Нејзиниот претходник беше структурата за соработка меѓу полициските власти, основана во 1923 година во Виена.
Преку Интерпол, земјите-членки разменуваат информации за барани лица.
Извор: 360stepeni.mk
