Москва испрати порака до Украинците: Нападот на Белгород нема да остане неказнет

Во нападот на Белгород, град во близина на украинската граница, загинаа 14 лица, меѓу кои и две деца, а беа повредени 108 лица, од кои 15 деца

Руското Министерство за одбрана денеска соопшти дека нападот на Белгород во кој загинаа 14 лица нема да помине неказнет, истовремено обвинувајќи ја за нападот украинската армија.

„Тој напад нема да помине неказнето“,

објави Министерството на Телеграм, уверувајќи дека руските сили успеале да пресретнат два проектила и повеќе ракетите лансирани кон тој град.

Москва ја обвини украинската војска дека извршила напад врз Белгород, град во близина на украинската граница, во кој загинаа 14 лица, меѓу кои и две деца, а беа повредени 108 лица, од кои 15 деца. Ова се случи еден ден по големиот руски воздушен напад врз Украина во кој загинаа 39 луѓе.

Фотографиите објавени на интернет покажуваат запалени автомобили, згради со скршени прозорци и црн чад што се издига од неколку објекти.

„Рускиот претседател Владимир Путин бил информиран за нападот врз одредени населби на градот“,

изјави портпаролот на Кремљ Дмитриј Песков.

Украина, која беше нападната од Москва во февруари минатата година, редовно извршува напади врз цели во Русија, особено во областите блиску до нејзината граница, но бројот на жртви обично е помал.

Киев се уште не реагирал на руските обвинувања по нападот во саботата.