Протестот започна со говори кај фонтаната „Теразије“, а продолжи со прошетка до Уставниот суд. Демонтрантите симболично им покажаа црвен картон на институциите
Протестот повикан од иницијативата „ПроГлас“ се одржа денеска во Белград, на кој присуствуваа повеќе од 10 000 луѓе.
Протестот започна со говори кај фонтаната „Теразије“, а продолжи со прошетка до Уставниот суд.
Демонтрантите симболично им покажаа црвен картон на институциите.
Според „ПроГлас“, повод за протестот е промената на изборната волја на граѓаните.
Актерката Светлана Цеца Бојковиќ на почетокот на протестот прочита примери за изборни нерегуларности и уцени забележани во извештајот на набљудувачката мисија на ЦРТА.
Таа го наведе примерот на жена од Србија, болна од рак, која чека на операција.
„Некој од партијата нуди да ја турне на листа на чекање, практично за да и ги зголеми шансите за преживување. Таа само треба да биде сигурен глас за возврат и да добие уште неколку сигурни гласови“,
изјави Бојковиќ.
Пред толпата се обрати и Срѓан Цвијиќ како еден од контролорите на неодамнешните избори, кој рече дека контролорите не се виновни што не можеле да спречат изборна кражба.
На митингот дојде и потпретседателката на Партијата за слобода и правда, Мариника Тепиќ, која веќе 13 дена штрајкува со глад, која беше поздравена со силен аплауз од граѓаните.
Таа на сцената се качи со помош на колегите Мирослав Алексиќ и Радомир Лазовиќ.
„Жал ми е што не можам и немам многу да ви кажам. Веќе кажав сè, дека овие избори мора да се поништат“,
кратко изјави Тепиќ, која зборуваше во видно лоша состојба.
Радомир Лазовиќ, шеф на коалицијата „Србија против насилството“, рече дека бараат поништување на изборите.
„Бараме поништување на овие украдени избори и нивно повторно одржување под фер услови, со организиран избирачки список, за да нема фантоми“,
изјави тој.
Секојдневните протести на српската опозиција започнаа на 18 декември откако матичната партија на претседателот Александар Вучиќ, СНС, ден претходно прогласи целосна победа на изборите, за кои опозицијата тврди оти се украдени од власта.
Покрај републичките и покраинските избори, на 17 декември се одржаа и локални избори во 65 градови и општини, меѓу кои и Белград.
Извор: 360stepeni.mk
