Експерти веруваат дека од Северна Кореја се очекува, освен во зголемувањето на својот нуклеарен капацитет, наредната година да преземе чекори и во насока на проширување на соработката со Русија и Кина, исто така земји ривали на САД
Севернокорејскиот лидер Ким Џонг Ун им нареди на војската, индустријата за муниција и нуклеарно оружје на земјата да ги забрзаат подготовките за војна за да се спротивстават на, како што вели, невидените конфронтирачки потези на САД, објавија денеска тамошните државни медиуми, пренесува Ројтерс.
Говорејќи за политичките насоки за следната година на клучниот состанок на владејачката партија во земјата, Ким, како што објавила државната новинска агенција КЦНА, рекол дека Пјонгјанг ќе ја прошири стратешката соработка со „антиимперијалистички независни“ земји,
Од друга страна, пак, Јужна Кореја најави дека остро ќе одговори на секоја провокација на Пјонгјанг.
Коментарите на Ким, дадени за време на политичкиот состанок, според анализите на странските медиуми, сигнализираат дека Северна Кореја ќе продолжи да спроведува нуклеарни тестови за модернизирање на својот нуклеарен арсенал.
Набљудувачите велат дека Ким сака да го искористи својот нуклеарен арсенал за да изврши притисок за дипломатски преговори со Вашингтон, доколку дојде до дијалог меѓу двете страни по претседателските избори во САД следната година.
Инаку, седниците на единствената партија во земјата – Работничката партија на Северна Кореја, е планирано да траат неколку дена, а деталите од средбите ќе бидат објавени по нивното завршување на 31 декември.
Експерти веруваат дека од Северна Кореја се очекува, освен во зголемувањето на својот нуклеарен капацитет, да преземе чекори и во насока на проширување на соработката со Русија и Кина, исто така земји ривали на САД.
Јужнокорејската разузнавачка агенција денеска соопштила дека има голема веројатност Северна Кореја да изврши воени провокации и кибернапади пред парламентарните избори во Јужна Кореја, закажани во април, претстојната година и претседателските избори во САД во ноември, пренесува регионалниот сервис на Радио Слободна Европа (РСЕ).
Од минатата година, Северна Кореја изврши неколку ракетни тестови, со што ги прекрши резолуциите на Обединетите нации кои му забрануваат вакви дејствија на Пјонгјанг.
Минатата недела, земјата ја тестираше најнапредната ракета што ја има – Хвасонг 18 – за која верува дека има капацитет, односно дострел, да погоди американско тло.
Севернокорејците веруваат дека имаат легитимно и суверено право да вршат такви тестови, наведувајќи ги воените вежби меѓу САД и Јужна Кореја, кои тие ги гледаат како подготовки за инвазија на нивната земја.
Севернокорејскиот лидер одби дијалог со САД по неуспехот на преговорите во 2019 година со тогашниот американски претседател Доналд Трамп, во рамките на кои клучното прашање беше како да се укинат некои од санкциите кон Северна Кореја, во замена за нуклеарно разоружување на земјата.
Извор: 360stepeni.mk
