ГАЗА (АА) – Бројката на убиени Палестинци во израелските напади на Појасот Газа се зголеми на 20.674, соопшти вчера Министерството за здравство на палестинската енклава, известува Анадолу.
Портпаролот на Министерството за здравство на Палестина, Ашраф ал Кудра, рече дека во нападите се повредени 54.536 лица.
Министерството за здравство на Газа информираше дека во израелските напади во последните 24 часа се убиени 250 Палестинци.
Околу 2 милиона луѓе се раселени во густо населената палестинска енклава поради недостиг на храна и чиста вода.
– Израелски напади на Појасот Газа
Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7 октомври.
На 24 ноември, во 07:00 часот по локално време, стапи на сила четиридневната хуманитарна пауза договорена меѓу Хамас и Израел, која потоа беше продолжена за уште три дена.
На 1 декември (петок), по завршувањето на хуманитарната пауза, израелската војска продолжи со своите интензивни напади низ Појасот Газа.
Во заробеништво сѐ уште се наоѓаат 130 Израелци. Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
Извор: www.aa.com.tr
