УНРВА вложува напори да овозможи нега за 50.000 трудници во Појасот Газа

ЊУЈОРК (АА)

Агенцијата на Обединетите нации за палестинските бегалци (УНРВА) вложува огромни напори за да им обезбеди нега на најмалку 50.000 трудници во Појасот Газа во екот на бруталните израелски напади, известува Анадолу.

„Се проценува дека во Појасот Газа има околу 50.000 трудници, а секој ден се породуваат повеќе од 180 од нив“, се наведува во соопштението на УНРВА.

Агенцијата на ОН соопшти дека нејзините лекари и бабици прават сѐ што можат за да им овозможат нега на трудниците во седум оперативни здравствени центри на УНРВА.

– Израелски напади на Појасот Газа

Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7 октомври.

На 24 ноември, во 07:00 часот по локално време, стапи на сила четиридневната хуманитарна пауза договорена меѓу Хамас и Израел, која потоа беше продолжена за уште три дена.

На 1 декември (петок), по завршувањето на хуманитарната пауза, израелската војска продолжи со своите интензивни напади низ Појасот Газа.

Од почетокот на израелските напади на Појасот Газа на 7 октомври досега се убиени најмалку 20.424 Палестинци, главно жени и деца, а ранети се повеќе од 54.036 лица, објавија здравствените власти на палестинската енклава, при што околу 2 милиона луѓе се раселени во густо населената палестинска енклава поради недостиг на храна и чиста вода.

Во заробеништво сѐ уште се наоѓаат 130 Израелци. Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.

„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..