Српската полиција апси демонстранти, по обидот за влез во Градското собрание во Белград

Претседателот Александар Вучиќ за вечерва свика седница на Советот за национална безбедност

Полицијата во соработка со Вишото јавно обвинителство во Белград почнале да апсат лица кои вечерва се обидоа да упаднат во зградата на Градското собрание на Белград, јавуваат дел од српските медиуми. Повредени се и неколку полицајци кои ја обезбедувале зградата.

Универзитетската професорка Билјана Стојковиќ за Н1 изјави дека и четворица студенти биле уапсени близу чешката амбасада, дека биле внесени во цивилен автомобил и биле приведени од маскирани и вооружени лица.

Претседателот Александар Вучиќ за вечерва закажа седница на Советот за национална безбедност.

Поддржувачите на коалицијата „Србија против насилството“ (СПН) вечерва го продолжија протестот пред Собранието на Белград, каде полицијата реагираше со солзавец, откако се направи обрач околу зградата, а опозицијата се обиде да упадне внатре. Имаше туркање пред влезот, а искршено е стаклото од влезната врата.

Демонстрациите се против изборните нерегуларности во Србија.

Претседателот Александар Вучиќ во обраќање вечерва изјави дека не е во тек никаква револуција и дека на „помпезно“ најавениот собир се појавиле вкупно 2 490 лица, додека во моментот на неговото обраќање имало 1 195 пред Градското собрание.