Иницијативата, која предвидува три одделни фази, била претставена на разговорите одржани претходно оваа недела во Каиро, меѓу египетските власти и тимот на Хамас
Египет подготвил предлог за прекин на борбите меѓу Израел и Хамас и ослободување на уште заложници кои ги држи палестинската исламистичка група, јави ДПА, цитирајќи регионална телевизиска мрежа.
Иницијативата, која предвидува три одделни фази, била претставена на разговорите одржани претходно оваа недела во Каиро, меѓу египетските власти и тимот на Хамас, јавува саудискиот канал Ашарк Њуз, кој се повикува на извори запознаени со разговорите.
Првата фаза, наводно, вклучува прекин на огнот од најмалку две недели за време на кој Хамас ќе ослободи 40 израелски заложници – жени и деца, како и постари лица кои се болни. За возврат, Израел да ослободи 120 Палестинци од своите затвори. Оваа фаза предвидува и прекин на непријателствата за наведениот период и обезбеден пристап до хуманитарна помош до Појасот Газа.
Во втората фаза се предлага палестински преговори, со посредство на Египет, за ставање крај на внатрепалестинската „поделба“ и воспоставување на палестинска технократска влада која ќе владее со Газа и на Западниот Брег.
Третата и последна фаза, според написот, повикува на целосен прекин на огнот и „сеопфатен“ договор за ослободување на целиот израелски воен персонал што го држи Хамас и другите палестински фракции во замена за палестинските затвореници во Израел. Оваа фаза, исто така, вклучува повлекување на Израел од Појасот Газа, истовремено дозволувајќи им на раселените жители на Газа да се вратат во своите поранешни домови во енклавата.
За предлогот ќе расправа политичкото биро на „Хамас“ во Катар, пренесува телевизијата. Засега нема коментар ниту од Египет, ниту од Хамас, која е прогласена за терористичка група во Израел, ЕУ и САД.
Извор: 360stepeni.mk
